Í dag afhentum við Þyrlusveit Landhelgisgæslunnar tvö hjartstuðtæki/mónitora að andvirði 4.500.000 kr sem minningarsjóðurinn hefur safnað síðustu tvö ár úr hinum ýmsu áttum.

Hlaupahópur Jennýjar Lilju hefur safnað áheitum í Reykjavíkurmaraþoni Íslandsbanka og ásamt áheitasöfnun hefur minningarsjóðurinn fengið peningagjafir úr öðrum áttum. Þar ber að nefna minningarkort sem er hægt að nálgast í gegnum heimasíðu minningarsjóðsins. Einnig hafa borist peningagjafir frá einstaklingum og fyrirtækjum og við erum þeim ævinlega þakklát. Systurnar Eva og Tinna hönnuðu peysu í samvinnu við NoRom en peysurnar voru hannaðar með Jenný Lilju og systkinum hennar í huga. Hjörtun framan á peysunum tákna tvíburasysturnar og hjartablöðrurnar á erminni tákna sysktinin. 1000 kr af sölu hverrar peysu renna til minningarsjóðsins. Árlega heldur Pókerklúbburinn Bjólfur opið styrktarmót þar sem er hægt að leggja málefnum lið með frjálsum framlögum og síðustu tvö ár hefur Bjólfur safnað fyrir Minningarsjóð Jennýjar Lilju.

Við eigum starfsfólki þyrlusveitar landhelgisgæslunnar mikið að þakka og sú virðing sem þau sýndu okkur á slysstað og eftir slysið er ólýsanleg.

Mikið álag hefur verið á íbúum Seyðisfjarðar síðustu daga vegna gríðarlega náttúruhamfara sem hafa gengið þar yfir. Minningarsjóður Jennýjar Lilju styrkti í dag Björgunarsveitina Ísólf en búnaður og húsnæði sveitarinnar varð fyrir tjóni í þessum hamförum. Hugur okkar og hjörtu eru hjá Seyðfirðingum öllum

Í dag 24. október afhendir Minningarsjóður Jennýjar Lilju peningagjöf að upphæð 1.619.000 kr til Landsbjargar en í ár hlupu vinir og ættingjar Jennýjar Lilju fyrir þetta málefni í Reykjavikurmaraþoni Íslandsbanka 2020.

Upphæðin rennur í nýstofnaðan sjóð sem veitir meðlimum björgunarsveita á öllu landinu fjárhagslegan stuðning svo þeir geti leitað sér aðstoðar fagfólks eftir erfið útköll og upplifanir.

Í dag eru 5 ár síðan Jenný Lilja lést og því er það okkur dýrmætt að afhenda þennan styrk á þessum degi. Það er okkar ósk að þessi styrkur komi að góðum notum og hjálpi hetjunum sem eru ávallt tilbúnar fyrir okkur þegar á reynir.

Vegna aðstæðna í þjóðfélaginu fór afhendingin fram í gegnum veraldravefin.

Nú er orðið ljóst að Reykjavíkurmaraþon Íslandsbanka verður ekki haldið þetta árið. Hlauparar geta þó ennþá safnað áheitum og eru hvattir til að hlaupa sjálfir eða í litlum hópum þennan dag. 

Við fjölskylda og vinir Jennýjar Lilju höfum ákveðið að hlaupa þennan dag og halda áfram að safna áheitum sem renna til Landsbjargar.

Síðustu ár hafa hlauparar, sem hafa safnað áheitum fyrir Minningarsjóð Jennýjar Lilju, safnað tæpum 6 miljónum króna í áheitasöfnun á hlaupastyrkur.is sem hafa farið í góð málefni.

Það er hægt að leggja áheit á hlaupara sem hlaupa fyrir Minningarsjóðinn og um leið vera þáttakandi í að stofna sjóð sem meðlimir Lansbjargar geta sótt styrk í fyrir sálgæslu eða aðra aðstoð fagfólks. 

Við vitum öll hve mikilvægt starf björgunarsveita í landinu er. Nú er komið að okkur að leggja þeim lið því ávallt eru þau tilbúin að aðstoða okkur þegar við þurfum á aðstoða að halda. 

Hér er linkur á fallegasta hlaupahóp í heimi 😊 https://www.hlaupastyrkur.is/godgerdafelog/charity/988/minningarsjodur-jennyjar-lilju

Árið 2019 er á enda og nýtt ár tekið við. Þegar við lítum yfir árið er þakklæti okkur efst í huga. Fjölmargir hafa stutt við bakið á okkur og við höfum náð að styrkja góð og þörf málefni á árinu.

Í byrjun árs hélt pókerklúbburinn Bjólfur sitt árlega opna pókermót. Á mótinu gátu þátttakendur sett frjáls framlög í söfnunarbauk sem var ætlaður Minningarsjóðnum. Alls safnaðist 56.500 kr.  

Í apríl gaf minningarsjóðurinn þrjár loftdýnur til björgunarsveitarinnar Kyndils. Þessi gjöf var gefin eftir að einn liðsmaður sveitarinnar kom fram í viðtali og sagði sveitina vanta slíkan búnað. Loftdýnurnar eru hannaðar til að tryggja hámarks stöðuleika á ferð fyrir slasaða sjúklinga.

Á vormánuðum voru 56 hlauparar á fullum krafti í undirbúningi fyrir Reykjavíkurmaraþon Íslandsbanka . Þann 19 júní buðu foreldrar Jennýjar Lilju öllum hlaupurum á fyrirlestur með maraþon og ultrahlauparanum Sigurjóni Erni Sturlusyni. Hann fór yfir helstu þætti sem skipta máli í undirbúningi fyrir keppnishlaup og gaf hlaupurum góð ráð.

Stóra helgin , Reykjavíkurmaraþon Íslansdsbanka fór fram 24.ágúst 2019. Þennan dag hlupu 56 hlauparar fyrir minningarsjóð Jennýjar Lilju og söfnuðu áheitum. Hópur fólks stóð á hliðarlínunni og hvatti hlauparana áfram. Hvatningarstjórar sáu um að hlauparar fengju orku á miðri leið og klapp á bakið. Allir þessir aðilar stóðu saman og útkoman var áheitasöfnun sem skilaði sjóðnum. 1.671.000 kr.!!! Fyrir Reykjavíkurmaraþonið var minningarsjóðurinn búinn að setja sér það markmið að safna fyrir fjórum lyfjadælum fyrir þyrlusveit landhelgisgæslunnar. Það markmið náðist heldur betur.

Daginn eftir Reykjavíkurmaraþon buðu foreldrar Jennýjar Lilju öllum hlaupurum , hvatningarstjórum og fjölskyldum þeirra í pulsuveislu og partý enda tilefni til að fagna , faðmast og gleðjast yfir því sem hópurinn áorkaði í hlaupinu daginn áður.

Þann 13.nóvember fór fram afhending á tækjabúnaði til þyrlusveitar landhelgisgæslunnar. Þetta er stærsta úthlutun sjóðsins hingað til. Gjöfin samanstóð af fjórum lyfjadælum og tveimur vökva/blóðhiturum. Tækin munu koma sér vel þegar þarf að flytja slasaða og/eða veika einstaklega og þá sérstaklega börn.

Árið 2019 var viðburðaríkt og við viljum þakka öllum þeim sem studdu við starf sjóðsins. Allt þetta gerum við til að halda minningu Jennýjar Lilju á lofti í huga og verki. Fyrir það verðum við ávallt þakklát  

Rebekka og Gunni

Miðvikudaginn 13.nóvember sl tók þyrlusveit Landhelgisgæslunnar við gjöf úr minningarsjóði Jennýjar Lilju. Gjöfin samanstóð af fjórum lyfjadælum og tveimur vökva/blóðhiturum. Þetta er tækjabúnaður sem var ákveðið að safna fyrir í samráði við lækna þyrlusveitarinnar, en tækin mun koma sér vel þegar flytja þarf slasaða og/eða veika einstaklinga og þá sérstaklega börn.

Við settum okkur það markmið að safna fyrir fjórum lyfjadælum, sem náðist heldur betur. Við höfðum því svigrúm til að bæta við tækjum og í samráði við Viðar, yfirlækni bráðaþjónustu utan sjúkrahúsa, stakk hann upp á bæta við vökva og blóðhitara. Upphæðin sem var umfram dugði fyrir einum hitara en okkur fannst fráleitt að það væri bara til eitt sett og bætti minningarsjóðurinn því við það sem vantaði upp á til þess að kaupa tvo hitara.

Aðkoma þyrlusveitarinnar að slysinu þegar Jenný Lilja lést og aðkoma hennar að fjölskyldu Jennýjar Lilju eftir slysið hefur verið einstök. Hlýja og virðing er það sem hefur einkennt störf þeirra og samskipti. Starfsmenn Landhelgisgæslunnar koma inn í líf fólks á erfiðustu tímum í lífi þeirra. Þeir sýna virðingu í aðstæðum sem skiptir öllu máli þegar maður lítur til baka.

Við viljum þakka starfsfólki Landhelgisgælsunnar fyrir að vera fyrirmyndir og að starfa af virðingu við öll þau góðu störf sem þar fara fram

Við eigum ekki til nógu sterk orð til að lýsa þakklæti okkar yfir síðust helgi.

Hér á myndinni má sjá hluta af þeim 56 hlaupurum sem hlupu fyrir Minningarsjóð Jennýjar Lilju og fjölskyldur þeirra í árlegri myndatöku við leiði Jennýjar Lilju í Kópavogskirkjugarði. Hópur fólks studdi okkur öll með áheitum og fjölmargir studdu hlaupara með hvatningu og klappi á sjálfan hlaupadaginn. Allt þetta gerði okkur kleift að ná markmiði okkar sem var að safna fyrir fjórum lyfjadælum fyrir þyrlusveit Landhelgisgæslunnar. Alls söfnuðust 1.671.000 kr sem er rúmlega markmiðið. Landhelgisgæslan er því að skoða tækjabúnað sem við bætum við, því við ákváðum að öll áheitin í ár færu í tækjakaup fyrir þyrlusveitina.

Daginn eftir Rekjavíkurmaraþonið buðum við, foreldrar Jennýjar Lilju , öllum þeim sem hlupu fyrir minningarsjóðinn, hvatningarstöðvarstjórum og fjölskyldum þeirra í pulsupartý. Uppáhalds matur Jennýjar Lilju eru pulsur og ís og því er matseðillinn í partýinu sjálfsprottinn. Okkur þykir vænt um þá stund sem við eigum með yndislegu hlaupurunum okkar, við fáum að minnast Jennnýjar Lilju , faðmast og gleðast yfir því sem við náðum að áorka í hlaupinu með Jenný Lilju í hjarta og huga.

Miðvikudagskvöldið 19.júní s.l. buðu foreldrar Jennýjar Lilju þeim sem eru að undirbúa sig fyrir Reykjavíkurmaraþon Íslandsbanka á fyrirlestur með Sigurjóni Erni Sturlusyni maraþon og ultrahlaupara.

Sigurjón fór yfir helstu þætti í undirbúningi fyrir keppnishlaup, hvort sem það væri 10 – 21 – 42 km sem fólk stefni á. Talað var um mikilvægi markmiðasetningu, mataræði, styrktarþjálfun og mikilvægi þess að teygja eftir æfingar og keppnir.

Hann heldur út flottri facebook síðu sem er full af fróðleik og æfingum. Hann er líka mjög öflugur snapchat-ari (sigurjon1352) og er stundum að snappa frá keppnum sem hann er að taka þátt í.

Við viljum þakka Sigurjóni fyrir áhugaverðan fyrirlestur og hvatningu.

Á myndinni eru Ingólfur Hartvigsson frá Björgunarsveitinni Kyndli og fjölskylda Jennýjar Lilju.

Pókerklúbburinn Bjólfur hélt sitt árlega opna mót föstudaginn 11.janúar sl. Á mótinu gátu þátttakendur sett frjáls framlög í söfnunarbauk sem var ætlaður Minningarsjóði Jennýjar Lilju. Alls safnaðist 56.500 kr !

Við viljum koma á framfæri þakklæti til Pókerklúbbsins og þeirra sem tóku þátt í mótinu.